شعب ابو نجم يريد الانضمام الى الاسماعلية

نداء الى مدير المنتدى واللاعضاء وجمعية تطوير ابو نجم وجميع شرفاء البلد

الى كل من يبحث عن مصلحة البلد

لماذا لانستفيد من الظروف الحالية وحركة التغييرات التى تعم البلد
ونطالب بالانضمام الى الاسماعلية لكى نستفيد بالخدمات والمرافق الممتازة التى تتمتع بها القرى المجاورة لنا التابعة للاسماعلية وليس بيننا وبين تلك القرى سوى 2كيلو متر

وسوف تكون خطوة ايجابية للبلد علما بان التل الكبير بالكامل كانت تتبع الشرقية
وعلما بان 90% من اهالى كفر ابو نجم محل اقامتهم الاسماعلية وتراخيص سيارتهم وبطاقات التموين
تابعة الى الاسماعلية والله الموفق

اقتراح يستحق التفكير

اقتراح يستحق التفكير

وأن شاء الله سوف يتم التبليغ عن هذا الاقتراح الجميل

اليوم داخل الجمعية

فكره جميله جدا
تسلم يامعلم

وفقكم الله

بس دا ليه مزايا وعيوووووووووب وان زادت مزاياه

برجاء التفكير بحكمة ودراسة الامر قبل اجراء اى خطوة

وربنا يوفقنا للخير والاصله لللبلد واهلها

والله دى فكرة جميلة كان زمانة تحققت من اكتر من 30 سنة

الله يسامح اللي كان السبب
كان زمانا اكبر مركز فى الاسماعلية
وكنا ضمنا كرسيين دايمين فى مجلس الشعب باصوات العباسات وابو نجم
وكان حالنا افضل من كدة بكتير

لازم تفكير وتركيز فى الموضوع ده لازم نحسب كل حاجه هتحصل من ورا الموضوع ده

السلام عليكم ورحمة الله وبركاتة

السادة الاعضاء بعد التحية

هى فكرة وامنية تستحق العمل بجد من اجلها
وعشان ننضم للاسماعيلية اعتقد ان ذلك صعب شوية
لان تغير حدود المحافظات يتم بقرار جمهورى وليس على اساس الطلب او التمنى
وعلى اساس ان البلد فى الوضع الحالى ما فيس رئيس للدولة وبالتالى يمكننا الانتظار حتى شهر يناير ان شاء الله

وعلى اساس ان الكفر -- ما فيش حاجة بتميزة دون غيرة من البلاد المحيطة ---ما اعتقدش هيكون فى اهتمام من اى رئيس قادم لطلب الكفر حتى ولو رحنا عملنا اعتصام امام مبنى قصر العروبة

والكفر مثلا مش فية بترول ولا اثار عشان محافظة الاسماعيلية تكون حريصة على ضمنا ليها ------- طيب اية الحل-
الحل بسيط ان شاء الله
تقسيم المحافظات المصرية فى الوضع الحالى تم على اساس جغرافية وادارية قديمة عفى الزمن عليها
وتلك الاسس تم وضعها منذ زمن الاحتلال الانجليزى

والدليل على ذلك فى محافظات تعتبر زات كثافة عالية واخرة زات كثافة قليلة

المحافظات ذات الكثافة العالية تضم
%9.28 : القاهرة -
%7.35 : الشرقية -
%6.85 : الدقهلية -

وذات الكثافة القليلة تضم
%0.21 : جنوب سيناء -
%0.26 : الوادى الجديد -
%0.40 : - البحر الاحمر


والمعاير الحديثة المفروض على اساسها يعاد تقسم المحافظات زى ما حدث بين الشرقية والاسماعيلية سابقا والقاهرة والجيزة وحلوان و6 اكتوبر حديثا

1- عدد السكان .

2- المساحة .

3- تنوع البيئة والموارد الطبيعية مثل وجوب ان يمتد حدود كل محافظة لتشمل قدر الامكان حدود بحرية وزراعية وصحراوية .

4- الطبيعة الجغرافية .

5- مدى الكفاية والاعتماد على مواردها الذاتية .

6- تواءم الوحدات الادارية مع الدوائر الانتخابية النيابية والمحلية .

7- البعد الأمنى .

8- وجوب مشاركة المجتمع المحلى المعنى فى صناعة واتخاذ القرار موضوع تقسيم الحدود الادارية بأستخدام اليات منها عل سبيل المثال ، الاستفتاء الشعبى وجلسات الاستماع العام واستطلاعات الرأى .

لو نظرنا للبنود الثمانى السابقة هتلاقى شروط انتقالنا من الشرقية الى الاسماعيلية ينطبق علينا 6/8 يعنى كويس ان شاء الله

وبالتالى المطلوب من شاب كفر ابونجم
العمل على جمع توقيعات وتوكيلات عن نسبة كبيرة من شباب ولتكن توكيلات مجمعة لاحد المحامين الادرين البارزين
ونقوم برفع قضية فى القضاء الادرى ومجلس الدولة ضد كلا من
رئيس الجمهورية بصفتة الشخص المسؤل عن اصدار القرارات الجمهورية الخاصة بحدود المحافظات
ومحافظ الشرقية بصفتة الحاكم الادارى للشرقية والكفر تابع لها
محافظ الاسماعيلية بصفتة الحاكم الادارى للمحافظة المطلوب الانضمام ليها

والقضية هتاخد ليها من حوالى سنتين الى ثلاث سنوات وان شاء الله هنكسبها
وعلى فكرة مش هينفع الكفر ينضم من غير العباسة او وادى الملاك -الجبل-
يعنى نركز على الحدود المائية وان ترعة الاسماعيلية تكون فاصل طبيعى بين المحافظتين
وبالتالى المحجر والعزبة ومنشية العباسة هينفصلوا عن العباسة والجبل والكفر






فكروا كويس ولو انتم جادين فى التحرك اطرحوا الموضوع للنقاش فى الجمعية ومن ثم اطرحوة يوم الجمعة وسيبوا الناس فى الكفر تتناقش شهر وشوفوا راى البلدة
لو الناس متحمسة وموافقة ومستعدين يعملوا التوكيلات
لجنة من الجمعية توصل لحد الشهر العقارى وهاتوا اتنين موظفين ولفوا فى البلد واعملوا توكيلات مجمعة وقابلوا محامى كويس وربنا يعنكم


وشكرا للعميد على الفكرة الجميلة

الله عليك ديادكتور وليد

ديما متميز با أراك بارك الله فيك

دائما عملي في أرائك واقتراحاتك كما اعتدناك يا دكتور
وانا أؤيدك الرأي وشخصيا لا أمانع من السعي في هذا الاتجاه
ويكفينا شرف المحاولة وسوف ننجح بإذن الله

مع احترامي التام للعضو magic فالإسماعيلية جزء من مصر وأهلها هم أهلنا
اما حكاية نشيل جزء من الشرقية ونهديه للاسماعيلية فاعتقد انك قلت في الاول ان ابو نجم قرية بدون ميزة , يعني احنا اللي هنستفيد من الاسماعيلية
كل الفكرة اننا هنتحول إداريا للاسماعيلية ذات الكثافة السكانية الاقل والميزانية الأعلى عشان نقدر نستفيد والاجيال القادمة تستفيد بشكل افضل
طبعا الشرقية من المحافظات المظلومة مساحتها كبيرة وسكانها كتير وميزانيتها ما بتكفيش الخدمات
دا غير ان كتير من اهالي ابو نجم يحملون بطاقات وجوازات سفر من الاسماعيلية

فى البداية اشكر كل ابدى برئية فى الموضوع
وخاصة دكتور وليد بردة المميز

بالنسبة للعضو Magic

انت حسستنى بالذنب من غير ذنب
هو احن بنقول نبيع البلد ولا ندورها ونطلع من مكانها
احن بنقول نحاول ننضم اداريا للاسماعلية لعدة اسباب
1_خدمات المرافق
2_الطرق يارجل دى وصلة الجسر الوحيدة الى باقية بدون رصف من القاهر الى الاسماعلية الى قدام البلد

3_رخص القيادة وتراخيص السيارات لو جربت وروحت المرور ولو مرة هتعرف الفرق
4_فرص التوظيف فى الاسماعية اكتر بكتير نظرا لقلة عدد السكان
5_الخدمات الصحية والعلاجية شوف الفرق بين مستشفى التل وابو حماد
6_الشباب والرياضة شوف نادى الظاهرية وخرابة كفر ابو نجم
كل دة وبتسال
ادعى ربنا اننا ننضم الى الاسماعلية حتى لو حال الشرقية اتحسن هتكون اسماعلية احسن لان زى ما قولت عددسكانها اقل
هو الى عندة عيلين زى الى عندة عشرة


وفى النهاية اشكر العضو لؤلؤة على مدى ادراكة للموضوع

كل احترام وتقدير للمتميز والمحترم العضو العميد الذي يثبت لنا يوما بعد يوم أنه صاحب وجهة نظر ثاقبة ورجل عملي ويفكر بعمق وأؤكد له انه حاليا جاري دراسة الموضوع من الجهة التشريعية وجاري تجميع المعلومات اللازمة ونسأل المولى عز وجل التوفيق .

اشكر العضو لؤلؤة والعضو العميد على الرد وانا مقتنع تماما ان ميزانية محافظة الإسماعيلية اكبر بكتير من محافظة الشرقية بالإضافة الى فارق الكثافة السكانية بين المحافظتين
مفيش ذنب ولا حاجة بس الموضوع ممكن يفرق مع الناس اللى عايشين فى البلد وملاحظين الفرق مع القرى المجاورة اما انا عشت حياتى كلها فى الزقازيق ثم القاهرة وطول عمرى واخد ان اصلى من كفر ابو نجم - ابو حماد - شرقية واعتز كثيرا بذلك وعشان كدة حسيت ان الفكرة غريبة شويه عليا


اللهم اني نويت فيسر لنا امرنا ووفقنا الي ما فيه الخير و اجعله في ميزان حسناتنا وجزي الله الجميع خيرا و الله الموفق و المستعان

ليس غريبا عليك يا استاذ سامح هذه النظرة العاطفية الحانية لبلدك ابو نجم وكلنا نعتز بشرقاويتنا ما دمنا أحياء . وتوضيحك لوجهة نظرك أمر رائع ينم عن شخصية واعية مثقفه وانا أحييك على روحك الطيبة .
أما هذا الموضوع فهو مجرد فكرة أو حلم تحقيقها أمر معقد جدا ولكننا نرى أنها سوف تكون خطوة إيجابية جدا , وفي النهاية لن يتحرك أحد بدون توكيلات من الناس وبالتالي فالناس هي التي سوف تختار , وربنا عز وجل هو الموفق إلى ما فيه المصلحة .