يوميات المقص

موضوع: يوميات المقص الثلاثاء مايو 24, 2011 12:03 am

بسم الله الرحمن الرحيم

((( يوميات المقص )))

سوف أقدم لكم بمشيئة الله يوميات لشخصية افتراضية وليست موجودة في الواقع , وسوف تكون هذه الشخصية من أبو نجم و سوف أحاول بإذن الله من خلال يوميات هذه الشخصية سرد بعض الأحداث والطبائع المنتشرة في البلد
وأدعو الله أن أوفق في هذا

*******************
((( مقدمة )))

المقص شاب يبلغ من العمر 16 عام ويعيش في كفر أبو نجم , اسمه الحقيقي محمود وقد لقبه أصدقائه بهذا الاسم نظرا لأنه عندما يلعب معهم كرة فإنه يقص أرجل من يقابله في الملعب ,المقص دائم المشاكل والمشاغبات يدرس في صنايع أبو حماد وله شلة من الاصدقاء , له احلام وطموحات متلعبكة في بعض وحياته متنعفشة
تعالو نشوف لقطات من حياة المقص .
وما تنسوش ان كل الاحداث من خيالي والشخصية غير حقيقية وانا استأذن الاشخاص الذين سيرد ذكرهم في اليوميات ان يسامحوني لذلك .

انتظروني في يوميات المقص وان شاء الله هتعجبكم

( 1 ) انتخبوا المقص

في ليلة طلع المقص مع صاحبه ابو الليل على الجسر وقعدوا تحت الكوبري وما ادراك ما تحت الكوبري ,
المهم عدى عليهم السيد الدنص وكان جاي من ابو حماد بالليل فنادوا عليه يقعد معاهم
المقص : جاي منين يا معلم سيكا
الدنص : كنت ف مصلحة طرية مووووووت يا معلم
المقص : طب مش تلاغيني يا نجم كنت ادوس معاك في المشوار ده
رد عليهم ابو الليل : ياه على ام الفشر يا عم لخص وهات م الأخر كنت فين
الدنص لعب في شعره وقال : كنت مع ناس يا عم الحلو , ناااس عايشة مش زي الزمزقة دي , سلام .
ومشي الدنص وساب الرجالة في حيرة
المقص سأل ابو الليل سؤال : يا اخي الواد السيد ده محظوظ وعارف طوب الأرض وكل ما يروح حته تلاقي الناس عارفاه
رد ابوالليل : يا عم نفض هو غاوي شهرة ونظرة على خلق الله وطول الليل يلف على الافراح والموالد , هو سموه الدنص ليه , مش عشان غاوي رقص ف الافراح .
المهم الرجالة خدوا قعدتهم و ابو الليل كان معاه جوز كليوباترا فرط ضربهم وعزم ع المقص لكن المقص قاله يا عم لا ماليش في السجاير وقاموا روحوا ودماغ المقص بتغلي ومش عارف ينام
بيفكر ازاي يبقى مشهور زي السيد الدنص والناس كلها تعرفوا
فكر انه يروح الافراح بس افتكر اخر علقة خدها في التل المحطة
وكمان ما بيعرفش يرقص
فكر انه يتصاحب على شلة تانية بس ازاي وابوه مطلع عينه وما بيحبش السهر والعيال ما بتحبش تمشي معاه عشان بيروح بدري
وقعد يسأل نفسه : أيه الحل يا حودة ؟ فكر يا مقص ؟ فكر يا نجم ؟
كان بيفكر وهو قاعد قدام بيتهم ع المصطبة الجديدة وعينوا وقعت على الحيطة بتاعة الجيران ومكتوب عليها ( انتخبوا ابو راس لمجلس الشعب )
قال في سره الله يخرب بيت ابو راس وبيت راسه هو قارفنا في كل حته , كل لما امشي في طريق الاقي اسمه
وفجأة جات له فكرة موووووت وقام جري عشان يعملها
يا ترى ناوي على ايه يا قص
((( انتظروني الحلقة الجاية عشان تشوفوا افكار المقص هتعمل فيه أيه )))

نحن فى انتظاركم قى الحلقات القادمه واين الالغاز ياغالى

ايه يا قلب

عايزين نعرف المقص هايعمل ايه

إن شاء الله هكمل يا استاذ محمد ولكن ما لقتش تفاعل فقلت الموضوع ممل
بس مش مهم هاكمل وزي ما تيجي
ومبروك عليك اللقب الجديد

طبعا كلنا فاكرين لما المقص جري عشان ينفذ فكرته
دخل البيت بسرعة وراح الأوضة الجوانية اللي فيها الكراكيب , وهو دخل شاف العجلة بتاعته المتكسرة , بصلها بزعل وقال في سره الله يلعن أم الهبل .
دخل الأوضة وجاب جركن كبير فية جير كان باقي من دهان الأوضة بتاعته لما دهنها الشهر اللي فات
مسك الجير في ايده وفكر شوية !!!!!! ده لون ابيض بس ولسه عايز لون يجيب منين ؟ منين ؟
قال في سره ما فيش غير عمي فتحي .
جري على محل فتحي ابو رزق عشان يشتري اللون لقيه قفل خلاص الساعة بقت 11 بالليل
قال والله مانا ماشي إلا لما اشتري اللون
لف ع الباب التاني بتاع سلطان ابن عمك فتحي وقعد يخبط
سلطان فتح وهو مضايق وقال خير يا مقص عايز ايه دلوقتي ؟
قاله عايز علبة لون يا سلطان .
سلطان هتستهبل يلا ! مش شايف الدكان مقفول
المقص : معلش يا معلم مزنوق فيها دلوقتي , اصلي عايز ادهن الاوضة عشان جايلي ضيوف الصبح .
سلطان :ضيوف ايه يا ابو ضيوف انت هتصيع عليا, الله يقرفك .
ادخل واستناني لما اجيب المفتاح من جوا .
المهم المقص خد اللون الازرق وروح جري
ظبط الفكرة وقعد لغاية الساعة 2 بالليل
لما الرجل هديت في الشارع طلع ومعاه جردل الجير واللون وفرشة .
الجلالة خدته ومسك حيطان الشارع شخبطة ( انتخبوا المقص ) – ( المقص بيمسي ع الشباب )
( المقص = الحب كله ) – ( شيش بيش - المقص غيرو ما فيش )

وهاتك يا هرتلة لما وصل عزبة نايتي
شوية ولقي محمود الغني وشلته جايين من ناحية المضيفة
قال في سره يا نهار مش فايت العيال دي لو شافتني هتقرفني أنا اخلع احسن
ورمى الجردل والفرشة في ارض محروس وخلع

وجاء الصباح ليحمل دعاية المقص لعيون الشعب

ابو المقص صحي وماشي ع الشغل لقي الشارع كله اعلانات للمقص
اتجنن وقال يا نهار مش معدي و لف وعايز يرجع. لقي لمه في الشارع وناس بتزعق
راح يشوف ايه لقي الدنيا مولعة وجارهم اللي في اول الشارع عمال يسب ويلعن (( يا عالم انا لسه مخلص دهان امبارح يجي عيل واطي ابن واطي ويشخبط ع الحيطة والله ما انا سايبه لو اعرفه , مين المقص ده حد عارفه ))
ابو المقص وقف ساكت مش عارف يعمل ايه ويقول أيه , هو عارف ان اصحاب ابنه محمود مسمينو المقص وعارف ان ما حدش يعملها إلا هو . وما قلش غير يارب استر ,,, في سره .

مين اللي معدي وشايف المشكلة ( محمود الغني )
وقف يتفرج ويشوف ايه اللي بيحصل وقال لنفسه . ههههههه عملتها يا قص وانا اقول ايه اللي مسهره امبارح في عزبة نايتي , فققر محمود انه يتدخل
يا ترى محمود الغني هيعمل ايه

(( انتظروني الحلقة الجاية عشان تعرفوا محمود عمل ايه ))

السلام عليكم ورحمة الله وبركاته

اخي الفاضل , شكرا جزيلا على هذه اليوميات خفيفة الظل التي جعلتنا نتخيلها وكأننا نعيش الاحداث
ولكن ارجوك ان تستأذن الاشخاص الذين ذكرتهم ولو في مساهمة هنا
وإذا اعترض احدهم فسأضطر اسفا لنقل اليوميات إلى قسم المواضيع المحذوفة لحين تعديلها
كما ارجو منك الحفاظ على مستوى الحوار
وانا شخصيا معجب بها جدا وارجوك لا تتوقف ولكن مع مراعاة مشاعر الاخرين

المدير العام

وانا تحت امرك بس انا قلت في البداية ان دي مجرد احداث خيالية وحبيت احط فيها اشخاص من البلد عشان تديها طعم ابو نجم ولو حد زعلان انا مستعد احذف اليوميات نهائي او اعدلها
وشكرا للمتابعة

» يوميات طالب فاشل فى رابعة ابتدائى - الحلقة الاولى - ( عم زنكلونى والجرس)
» يوميات مشرف مخنوق
» يوميات طالب فاشل فى رابعة ابتدائى
» يوميات طالب فاشل فى رابعة ابتدائى ( المقدمة )
» يوميات الكبار فى طره.. نظيف مصدوم.. والعادلى يحمل سبحة99..