ما تبكيش عليا ياما انا الكسبان

دقوا الدفوف و افرحوا بعروسه الأوطان
يدارى من حسنها الورد فى الأغصان
يوم الزفاف اتجمعوا كتير من الشبان
و مصرنا متزينه بالطرحة و الفستان
اتجمعوا أهل الوطن و حددوا الأزمان
كتبوا كروت الفرح بدمهم يا زمان
ماتوا عشان يرسموا البسمه بالألوان
يوم الزفاف اتعزم كتير من الشجعان
كان التاريخ فى يناير والمكان فى ميدان
صورة شهيد الوطن محطوطه على الفستان
بيقول ياما امسحى دمعك دا انا الكسبان
جات الرصاصه فى قلبى من الغدر والطغيان
أنا ياما مش زعلان دا أنا أشجع الشجعان
يلا بزفافك افرحى و من قلبى أنا فرحان
وحشونى اخواتى و أهلى فى الميدان
أنا مت علشانهم و عشانك انتى كمان
زفونى على الجنه ملايكه الرحمن
سلمت بادايا على الملايكه كمان
قابلت شهدائنا اللى سابونا زمان
حاربوا فى أكتوبر وحرروا الأوطان
صاحبى واحد منهم تخيلى كان مننا زعلان
رواكى من دمه و دمه علينا هان
بس خلاص ياما دلوقتى بقى فرحان
قالى انه كان حاسس و فينا كان عشمان
اطمنى ياما ما عادش فيه أحزان
دا انا هنا مكرم وعمرى ما ابقى مهان
تصورى ياما بقيت من الأعيان
أنا عندى بيت فى الجنه و أرض ملك كمان
عمرى ما كنت اتمنى العيشه ديه زمان
أمانه السلام ياما للأهل و الاخوان
أنا هنا قاعد للنصر مستنى
ماسك علم مصرى
لسه عليه دمى
فرحان و متهنى
و هربت من همى
عايز أشوف ابنى فرحان وبيغنى
عايز أشوف اخويا أيامه مش زيي
يعيش على أرضه بكرامه المصري
يحقق الأحلام و كل ما اتمنى
أنا معاه بروحى
أنا معاه بقلبى

» كان ياما كان
» يا برادعى بالراحة عليا كفر ابونجم مهياش نووية
» عليمات عليا تلغى سفر المنتخب الأوليمبى إلى القدس
» آخر أخبار محافظة الشرقية اليوم